zondag 10 november 2013

Òfwegens

de man kikt
deurdringend in d'ogen
van de vraauw tegenover
dij ain en aal zenen
poestend en stìnnend
talloze zoaken verkloart
verkregen gegevens
worden digitoal verwaarkt
en n laptop brengt
noa n leste drok
op enter d'uutslag
definitief in koart
onder t mom van
bedainen op moat
en persoonleke aandacht
wordt de levensloop
blootlegd en ligt de noadrok
op t beheersen van kosten
verlainde mantelzörg
deur buren of femilie
wordt uutruild
tegen n traplift
of steunkouzen
en aandere posten
t recht is verdrongen
deur intakegevallen
en de puutholder is ain
mit de beoordailoar
de terugtredende overhaid
komt ain nait tegemuide
en t welwezen weegt din
wellicht minder zwoar
eltje ©

11 November


Klem

in systemen
woar aal voaker
kwantitatieve prikkels
aigenbelangen verstrengeln
deurdat scores geld genereren
zit de duvel elk op d'hakken
in klimoaten
woarin bonuzzen
koppeld worden aan getallen
deur statistieken op te drieven
en te sturen op kwantiteit
goan managers over mìnselke wrakken
deur gebrek aan integriteit
binnen eerlek- en oprechthaid
wereldvrumde woorden
en worden lu tot wanhoop dreven
omdat psychische drok
laaidt tot ìnkeld minnen
t welwezen wordt plet
onder n wals van korrupsie
woardeur aal minder lu
de dans ontspringen
omdat ze in n drijkwartsmoat
gain jive dansen kinnen
eltje ©

zondag 3 november 2013

Protokollen


regels
vol stappen
zet op pepier
mit standoards
om òf te vinken
geven richten aan
t bepoalen van ruumtes
om te handeln
doulmoateg
vanuut "evidence based"
bepoalen checklisten
doulmoateghaid
en kwaliteit
van de wegen
dij professionals
bewandeln
mit waitenschop achteròf
is makkelk te oordailen
over prosezzen dij wie evalueren
mor emootsies en gevuilens
beïnvlouden humoan gedrag
en dij kin je stoer steriel reguleren
eltje ©

zondag 27 oktober 2013

Kleur bekennen

de rooie droad
in n pienleke diskuzzie
is voak dat nait elk woord
op n goldschoaltje wogen is
en dat veul bekeken wer
deur gekleurde brillen
t wederzieds
swaart moaken
van de blinde dij
mit gruin en geel
veur d'ogen oordailde
was voak d'oorzoak
van veul kleurverschillen
nooit staait
swaart op wit
wat widde wieven brengen
mor nait elk
verstaait de kunst
kleuren harmonieus te mengen
eltje ©

donderdag 17 oktober 2013

Tolerantsie


n swaarde pion
blast hoog van de toren
noa t nemen
van n widde kunk

zo'n loze zet
wordt diskutoabel
as de kleur aanzet
tot n negatieve dunk

bewonderd wordt
din nait t spelinzicht
mor speulen der aandere
subjektieve sentimenten

mor wat swaart is
mout je woarachteg
nait blaiken willen
mit gekleurde argumenten

eltje ©



Sotsji


tegen n heldere locht
wappert de vlaag
in n wind van respekt
dij zacht zuzooiend
vief ringen van verbondenhaid streelt 

en "citius altius fortius" tilt
noar verbondenhaid van talenten

sneller hoger staarker 
is t streven
van n sportieve stried 

dij streden wordt
mit respekt veur prestoatsies 
van elke tegenstander
van alle kontinenten


sport verbruiert
mor staait in vuur en vlam
as politiek split
univerzele rechten schendt 

zodat "hot cool yours" n dilemma wordt 
onder t oog en over de rug
van sporters en prominenten


eltje © 

Marionetten


onzichtboar
achter duustere gedienen
regiseren schimmege krachten
n spel
mit hoofdrollen
veur lobbyisten
dij op strategische pozietsies
politisie manipuleren

fluusternd
bewust boeten beeld
dirigeren spindokters
t verhoal
vol propaganda
van belangengroepen
dij handeg handelnd
filaain opereren

macht
kent veul verlaizers
want onmacht ruirt zich nait

historie
herhoalt zich voak
as n noakte woarhaid

eltje ©

woensdag 16 oktober 2013

Laifde



Europa

woar vrijhaid n recht is
opereren organizoatsies
mit duustere praktieken
gewaiten- en haarteloos
in handel en wandel

woar transperantsie n plicht is
loeren georganizeerd
misdoad en korrupsie
op miljarden mit uutwazzen 
as mìnsenhandel

onmìnselke neren 
in levens dij nait tellen
dut geld op bulten schieten

gifmengers aktief
in overhaidssektoren
goan veur aigen perfieten

eltje ©

Swaardepieten

n bont palet
wekt wizzelnd'assosioatsies
vol herinnerns in rezoluutsies
van leeg tot hoog

n gekleurde bril
beïnvloudt t oordailen
is schoadelk en funest 
veur n dialoog

mainens worden kleurd
in doun en loaten
mor kleuren zulf
veroordailen nait

tinten binnen blind
zo nait d'emootsies
dij de mìns zulf inkleurt
tot aandermans verdrait

eltje ©